Во рамките на координирана акција со Инспекторатот на Градот Скопје, во текот на вчерашниот ден екипите на ЈП „Комунална хигиена“-Скопје започнаа акција за чистење на огромна дива депонија лоцирана во приватен двор во скопската населба Лисиче.

Екипите на ЈП „Комунална хигиена“-Скопје досега подигнаа и транспортираа 300 кубни метри кабаст и мешан комунален отпад, а активностите ќе продолжат и во текот на претстојните неколку дена, сè додека посочената локација не биде исчистена во целост.

Секое непрописно одлагање на отпадот надвор од поставените садови, претставува прекршување на Законот за јавна чистота и истовремено директно влијае врз загадувањето на животната средина и здравјето на граѓаните.

Во текот на месец септември 2018 година, Еко-патролата на ЈП „Комунална хигиена“-Скопје изготви 125 информативно-едукативни записници за граѓаните што беа забележани дека непрописно го одлагаат  својот отпад, а овие лица беа соодветно санкционирани и од страна на комуналните инспектори. Еко-патролата и во текот на претстојниот период ќе продолжи со координирани акции и дежурства во сите скопски општини.